Asosiy menu

12.10.2018 - “КАФОЛАТ суғурта компанияси” АЖ Тошкент Молия институти талабалари учун семинар ўтказди >>> | 09.10.2018 - "Кафолат суғурта компанияси" да "Fitch Ratings" халқаро рейтинг агентлиги таҳлилчилари билан учрашув бўлиб ўтди >>> | 09.10.2018 - "Кафолат суғурта компанияси" АЖ Хитой Халқ Республикаси делегациясини қабул қилди >>>

Умумий маълумотлар

Компания ўз фаолиятини 1997 йилда Вазирлар маҳкамасининг 144 - сонли махсус қарори асосида бошлаган. 2017 йил 9 октябрда Ўзбекистон Республикаси Президенти томонидан ПҚ-3317-сонли «Кафолат суғурта компанияси» АЖ фаолиятини такомиллаштириш чора-тадбирлари тўғрисида» ги Қарори имзоланди. 2017 йил 14 октябрда Ўзбекистон Республикаси Вазирлар Маҳкамасининг «Ўзбекистон Республикаси Президентининг 2017 йил 9 октябрдаги ПҚ-3317-сонли «Кафолат суғурта компанияси» АЖ фаолиятини такомиллаштириш чора-тадбирлари тўғрисида»ги Қарори ижросини таъминлаш бўйича НАЗОРАТ РЕЖАСИ» тасдиқланди. Қарорда компанияга аниқ йўналиш ва вазифалар белгилаб берилган бўлиб хозирги кунда уларни амалга ошириш юзасидан талай ишлар амалга оширилмоқда.

 Ўтган давр мобайнида Компания раҳбарияти асосий эътиборни қобилиятли мутахассислар жамоасини шакллантиришга қаратди. Мутахассисларнинг касб маҳоратини оширишга, ўқиш ва ўрганиш ҳамда янги келаётган ходимларнинг жамоага тез кўникишлари учун етарли шароит яратишга қаратилган кадрлар сиёсати янги куч ва ташаббусларнинг келишини таъминлади. Тажрибали мутахассисларнинг бой амалий ва услубий тажрибасини ҳамда ёш мутахассисларнинг янги ғояларини оқилона уйғунлаштириш эса мураккаб рақобатчилик шароитида қўйилган вазифаларни тез ва самарали ҳал қилишга қодир жамоани ташкил қилиш имконини берди.

Ўтган давр мобайнида компания барқарор ривожланди ва мамлакатда йиғилаётган суғурта мукофотлари ҳажми бўйича етакчилардан бирига айланиб, универсал суғурталовчи деган мақомга сазовор бўлди. Суғурта хизматлари бозорида ишончли, барқарор суғурталовчи ҳамда мижозларига ҳамкор эканлигини исботлай олди. 

 Компания ўз фаолиятини бошлаган кундан эътиборан суғурта соҳасида ўз мижозлари олдида барқарор ва ишончли компания сифатида ҳурмат қозонишга ҳаракат қилиб, низом жамғармасини мунтазам равишда ошириб борди. Хусусан, компания 500,0 млн. сўмлик низом жамғарма билан ташкил этилган бўлиб, акциядорлари Молия вазирлиги, «Асака банк», «Ипак йўли» банки ва бошқаларидан иборат бўлган бўлса, айни вақтда ушбу кўрсаткич 32,9 млрд. сўмга етказилди ва компания бу борада республикадаги суғурталовчилар ўртасида энг йирикларидан бирига айланди. Ҳозирда 600 дан ортиқ юридик ва жисмоний шахслар компания акциядорлари ҳисобланади. Бугунга келиб акциядорлар сафи Ташқи иқтисодий фаолият Миллий банки, Навоий кон-металлургия комбинати, Олмалиқ тоғ-металлургия комбинати каби йирик корхона ва ташкилотлар билан кенгайди.

 Сўнгги йилларда минтақавий тармоқни кенгайтиришга қаратилган сиёсат компания фаолиятининг устувор йўналишларидан бири сифатида қаралмоқда. Хусусан, Компания энг йирик минтақавий бўлинмалар тармоғига эга бўлишига қарамай аҳоли ва ташкилотларга яқинлашиш ҳамда мижозларга янада қулайликлар яратиш мақсадида янги бўлинмаларини очди. Ҳозирги кунга келиб компания таркибида 204 та ҳудудий бўлинмалар, жумладан, 15 та филиал, 38 та бўлим ва 151 та суғурта марказлари юридик ва жисмоний шахсларга кенг қамровдаги суғурта хизматларини кўрсатмоқдалар. Бундан ташқари аҳоли ва корхона-ташкилотларга бевосита жойларда суғурта хизмати кўрсатиш соҳасида компаниянинг 2000 га яқин юридик ва жисмоний суғурта агентлари сафарбар этилган.

 Компания аҳоли, корхона ва ташкилотларга янада яқин бўлиш мақсадида хизмат кўрсатиш тармоғини кенгайтирмоқда ҳамда ҳар бир мижознинг замонавий талабларига жавоб берувчи суғурта турлари спектрини тақдим этиб келмоқда. Компания ходимлари мижозларнинг талаб ва истакларини қондира оладиган янги йўналишлар ва суғурта турларини яратиш устида доимий равишда иш олиб боришмоқда.

 Компания ташкил топган дастлабки йилларда мажбурий ва иҳтиёрий суғурта соҳасининг 25 тури бўйича хизмат кўрсатилган бўлса, ҳозирга келиб, умумий суғурта тармоғининг барча 17 та класслари доирасида 100 га яқин суғурта турларини таклиф этиб келмоқда. Ҳусусан, сўнгги йилларда ихтиёрий тиббий суғурта, ипотека суғуртаси, лизинг суғуртаси, гаровга қўйилаётган автотранспорт воситаларини комплекс суғурталаш, экспорт шартномаларини комплекс суғурталаш, ижарага олинган кўчмас мулк суғуртаси, тиббиёт ходимларининг касбий жавобгарлигини суғурталаш каби бир қанча янги суғурта турлари ишлаб чиқилиб амалиётга тадбиқ этилди.

 

 

Суғурта бозоридаги бошқа компаниялардан фарқли равишда компания ҳар йили ўз режаларини давлатимиз раҳбарияти томонидан белгилаб берилаётган мамлакатни ижтимоий-иқтисодий ривожлантиришнинг устувор йўналишларига мос равишда ишлаб чиқиб, республикамиз иқтисодиётининг ривожланишига ва аҳоли турмуш шароитининг яхшиланишига ўз ҳиссасини қўшиб келмоқда. Давлат ижтимоий дастурларининг амалга оширилишида кўмаклашиш компания стратегиясидан алоҳида ўрин олган.

Қатор йиллар мобайнида тўпланган бой тажриба, компанияни ривожлантириш тадбирларининг босқичма-босқич амалга оширилиши маълум ижобий натижаларга олиб келди. «Кафолат суғурта компанияси» АЖ барча асосий иқтисодий кўрсаткичларда ўсишга, кадрлар таркибини яхшилаш ва моддий-техника базасини янада мустаҳкамлашга эришди. Натижада сўнгги йилларда Компания асосий кўрсаткичлар бўйича миллий суғурта бозорининг олдинги бешталиги қаторидан жой олиб келмоқда. 

 2017 йил якунига кўра компанияда жами суғурта мукофотлари ҳажми 80,3 млрд. сўмни ташкил этди. Суғурта мукофотлари умумий ҳажмида компания республикадаги 30 га яқин суғурталовчилар ўртасида 4- ўринни эгаллади. 

 Шу ўринда таъкидлаш керакки, мижозлар билан ишлашнинг фаоллиги даражасини акс эттирувчи суғурта шартномалари сони 726,3 мингдан ортиқни ташкил этди.

Суғурта қопламаларини тўлаш учун ҳужжатларни расмийлаштириш жараёнини такомиллаштириш, суғурта ҳодисаси содир бўлган вақт билан суғурта қопламасини тўлаш вақти оралиғини қисқартиришга алоҳида эътибор берилмоқда. Компаниянинг суғурта шартномалари бўйича тузилган мажбуриятларни тўлиқ ва ўз вақтида бажаришга интилиши суғурта ҳодисалари бўйича тўловларнинг ўсишида ўз тасдиғини топмоқда. 2017 йил якунига кўра юридик ва жисмоний шахслардан келиб тушган 7453 та даъво аризалари юзасидан суғурта қопламалари тўлаб берилди, бу ўрта ҳисобда кунига 28-29 та суғурта тўловлари амалга оширилганлигидан далолат беради. Суғурта қопламаларининг асосий қисми транспорт воситалари эгаларининг фуқаролик жавобгарлигини мажбурий суғурталаш, иш берувчининг фуқарлик жавобгарлигини мажбурий суғурта қилиш, гаровга қўйилган мулкни суғурталаш, юридик ва жисмоний шахсларга тегишли мулк ва автотранспорт воситаларини суғурталаш ҳамда шахсий суғурта турлари ҳиссасига тўгри келди. 

 Суғурта портфелини самарали бошқариш суғурта компаниясининг молиявий барқарор ва жадал ривожланишининг гарови ҳисобланганлиги учун, энг асосий вазифалардан бири суғурта портфелини диверсификациялаш фаолияти муҳим ўрин эгаллайди.

 Қонунчилик ҳужжатларига мувофиқ, тасдиқланган меъёр даражасидаги тўлов қобилиятини ва суғурта портфелининг баланс ҳолатини таъминлаш ҳамда суғурта хизматлари сифатини яхшилаш мақсадида компания миллий ва хорижий суғурталовчилар билан ҳамкорликда қайта суғурталаш операцияларини фаол амалга ошириб келмоқда. Жумладан, бу йўналишда Компания хорижий шериклардан «ВТА» ЕСК (Латвия), «Swiss Re» (Швейцария), «Hannover Re» (Германия), «Russian Re», «РНПК», «Ингосстрах», «Капитал Перестрахование», «Росно», «Москва-Ре», «Росгострах» (Россия) ҳамда миллий суғурта бозорининг етакчи қайта сууғурталовчилар билан тегишли шартномалар асосида самарали ҳамкорлик қилмоқда.

Компания активлари ҳажми ҳозирги кунда қарийиб 107,9 млрд. сўмни ташкил этмоқда. Ушбу ўсиш ички имкониятлар, хусусан, суғурта хизматларининг ҳамда инвестиция фаолиятидан олинган даромадларнинг кўпайиши ҳисобига амалга оширилди. Шу ўринда таъкидлаш жоизки, компания активларининг катта қисми унинг инвестицион портфелини ташкил этувчи ишончли, ликвидли ва даромадли активлардан ташкил топган. Инвестиция маблағлари асосан республикамизнинг йирик ва ишончли банкларининг қимматли қоғозларига ва депозитларига йўналтирилган. Компаниянинг инвестиция даромадларининг доимий равишда ўсиб бориши таъминланмоқда. Бу ўз навбатида суғурта мукофотлари тушуми билан бир қаторда қўшимча даромадларни таъминлаб, акциядорларга дивидендлар тўловини таъминлашга имкон яратмоқда.

  Мамнуният билан шуни таъкидлаб ўтиш жоизки, Компаниянинг сўнгги йиллардаги молиявий кўрсаткичлари барқарорлиги ҳамда ўз ишига масъулият билан ёндашаётганлиги натижаси ўлароқ Компания Халқаро Fitch Ratings агентлигининг В+ «барқарор» халқаро рейтингига сазовор бўлди,  ISO 9001:2015 халқаро сифат стандарти тадбиқ этилди, молиявий ҳисобот Халқаро стандартлар асосида аудит текширувидан ўтди, самарадорликни аниқлашнинг KPI кўрсаткичлари жорий этилди, барча меъёрий ҳужжатлар Корпоратив бошқарув кодексига мослаштирилди.

2017 йил 9 ойи якуни бўйича «Кафолат суғурта компанияси» АЖдаги корпоратив бошқарув тизими холис баҳоловчи ташкилот томонидан «юқори» баҳоланди, яъни Ўзбекистон Республикаси Давлат рақобат қўмитаси ва Корпоратив бошқарув илмий-таълим маркази томонидан тасдиқланадиган саволномага асосан компаниянинг кўрсаткичи 892 баллни ёки 74% ни ташкил қилди.

SAIPRO» ахборот-рейтинг агентлиги 2016 йил якунларига кўра «Кафолат суғурта компанияси» АЖнинг рейтингини «uzA++»  (энг юқори молиявий кўрсаткич) даражасида баҳолади.

Бу ютуқлар ўз навбатида, ташкилотнинг фаолияти ижобий баҳоланганлигини, унинг суғурта бозорида эгаллаган ўрни, фаолият кўрсаткичлари жадал ўсганлигини ҳамда кенг ривожланган агентлик тармоғи мавжудлигини тасдиқлаб, суғурта турлари бўйича хизматлар кўрсатишда пешқадамлик қилаётганлигини акс эттиради. Қолаверса, мижозлар ва ҳамкорлар учун унинг барқарорлик даражаси ва молия бозоридаги нуфузи рейтинг агентликлари томонидан берилган баҳо ҳисобига холислик касб этади. Бу эса компаниянинг мижозлар олдидаги нуфузининг янада ортишига хизмат қилмоқда.

 Ўзбекистон Республикасининг Кадрларни тайёрлаш миллий дастурини фаолиятга тадбиқ этиш борасида компания тизимида маълум ишлар амалга оширилмокда. Жумладан, Бошқарув, Қорақалпоғистон Республикаси, вилоятлар, Тошкент шаҳар, «Андеррайтинг маркази» филиаллари, уларнинг тасарруфидаги бўлинма ва суғурта марказларда хизмат қилаётган ёш мутахассислар орасидан истеъдодли, янгиликка интилувчан, рақобат шароитида ишлай оладиган, ижтимоий-иқтисодий ислоҳотларни амалга оширишга қодир бўлган номзодларни танлаб олиш, уларнинг сиёсий, маънавий-аҳлоқий савияси ҳамда профессионал малакасини ошириш бўйича маълум тизимли ишлар қилинди  ва давом эттирилмоқда.

 Ўзбекистон Республикаси Президенти фармонлари, Вазирлар Махкамаси қарорлари асосида ишлаб чиқилган компаниянинг ходимлар сиёсати ва уни ҳаракатга келтирувчи механизмлари фаолиятни амалга ошириш учун қабул қилинган барча ички меъёрий ҳужжатларни ҳаётга тадбиқ этиш шакл ва услублари асосида олиб борилмоқда.

Компания раҳбарияти ва ходимларининг сифат таркибини  ўрганиб бориш ва  уни яхшилаш жараёни бўйича тегишли ишлар доимий тарзда ташкил этилган бўлиб, ҳар чоракда бир маротаба ҳудудий филиаллар ва уларнинг тасарруфидаги бўлинма ҳамда агентликлар миқёсида ушбу йўналишдаги маълумотлар базаси мониторинг қилиниб тартибга солиб борилади.

 Компанияда фаолият кўрсатаётган ҳар бир ходимнинг илмий, амалий салоҳиятида унинг янгиликка, ўсишга интилиш кўникмаларида, ташкилотчилик қобилиятида ва компания ривожига ижобий таъсир кўрсатадиган бошқа хусусиятларида вақт ўтиши билан ўзгариш (ижобий ёки салбий) динамикасини ўрганиб бориб ва унинг касбий жиҳатдан ўсишига эътибор бериш ишлари йўлга  қўйилган.

 Компания тизимида ходимларнинг иқтисодий, маданий-маърифий билимларини, профессионал малакаларини, кўникмаларини доимий равишда Республика Олий ўқув  юртларида, академияларида, турли ўқув курсларида ва чет эллардаги ўқув марказларида ошириб борилишига зарур шароитлар яратилган.

 Ўтган давр мобайнида компания турли кўламдаги ва бизнес соҳасидаги мижозлар, ҳусусан суғурталовчиларга катта талаблар қўювчи йирик корхоналар ва давлат структуралари билан салмоқли иш тажрибасини тўплашга эришди. 

 Хусусан, бугунги кунга келиб Навоий тоғ-кон металлургия комбинати, Бекобод металлургия комбинати, «Оҳангаронцемент» АЖ, «Оҳангароншифер» АЖ, Фарғона нефтни қайта ишлаш заводи, Бухоро нефтни қайта ишлаш заводи, «Узтрансгаз» АК, «Ўзбекистон ҳаво йўллари» МАК, «Ўзбекистон темир йўллари» ДАК, Ўзбекистон Республикаси Ташқи иқтисодий фаолият Миллий Банки, «Ҳамкорбанк» ОАТБ, Ички Ишлар Вазирлиги, Ташқи Ишлар Вазирлиги, Миллий Хавфсизлик Хизмати, Ўзбекистон Республикаси Мудофаа Вазирлиги, Фавқулодда Вазиятлар Вазирлиги, Давлат Божхона Қўмитаси, Давлат Чегараларини Ҳимоя Қилувчи Қўмита ва бошқалар компаниянинг корпоратив мижозларидан саналишади.

Шу билан биргаликда, ҳозирги кунда уларнинг қатори кенгайиб бир қанча қўшма корхоналар, чет эл компанияларининг ваколатхоналари, элчихоналар билан ҳам ҳамкорлик ўрнатилмоқда.

 Мухтасар қилиб айтганда, компания келгусида ҳам аҳолини, иқтисодиётнинг реал сектори корхоналарини, кичик бизнес ва хусусий тадбиркорлик субъектларини суғурталаш масалаларига устувор вазифа сифатида алоҳида эътибор қаратади. Ўз стратегик мақсадидан келиб чиқиб, барча турдаги хўжалик юритувчи субъектларга, аҳолининг барча ижтимоий қатламларига юқори сифатли ҳамда тезкор суғурта хизматларини кўрсатиб, иқтисодиётимизнинг янада ривожланиши, аҳоли турмуш фаровонлигини бунданда ошириш йўлида фаолият олиб боришни мақсад қилиб қўйган.

 Ушбу мақсадга эришиш учун қатор тадбирларни амалга ошириш талаб этилади. Жумладан, илғор хориж тажрибасини ҳисобга олган ҳолда аҳоли ва тадбиркорлар талаб ва эхтиёжига мос келадиган янги ва жозибадор суғурта турларини ишлаб чиқиш, қишлоқ ҳудудларда аҳоли ва корхоналарга суғурта хизматлари кўрсатишни кенгайтириш, суғурта шартномалари шартларини мижоз талаби ва рақобат тамойиллари асосида шакллантириш, аҳоли ўртасида суғурта маданиятини ўстириш борасида тарғибот ва ташвиқот ишларини кучайтириш, республикамизнинг барча ҳудудларида пластик карточкалар орқали савдо муносабатларини ўрнатиш мақсадида барча бўлинмаларни терминаллар билан таъминланиш даражасини доимий ошириб бориш каби бир қанча масалаларни хал қилиш лозим бўлади.

 Фурсатдан фойдаланиб, компания рахбарияти барча мижозларга, ҳамкорларга ва акциядорларга кўп йиллик манфаатли ҳамкорлик ва билдирилган ишонч учун чин кўнгилдан ўз миннатдорчилигини билдиради ва фаолиятларида катта муваффақиятлар тилайди. Уларнинг иштирокисиз «Кафолат» бундай ютуқларга эришмаган бўларди. Шунингдек, алоҳида миннатдорчиликни компаниянинг барча ҳодимлари ва суғурта агентларига билдиради. 

 

Банк  реквизитлари:

хисоб раками  №20210000301949710001 валюта счети №20210840001949710004  КДБ банк Узбекистан, МФО 00842

 
Компания юқори ташкилоти:
Биз билан боғланиш -->